ਯਾਦਾਂ...../
ਦਿਲ ਬੈਠਾ ਏ ਖੋਲ ਪਿਟਾਰੀ ਯਾਦਾਂ ਦੀ ।
ਹੰਝੂ ਕਰ ਕਰ ਆਉਣ ਸਵਾਰੀ ਯਾਦਾਂ ਦੀ।
ਪੰਧ ਲਮੇਰਾ ਮੰਜ਼ਿਲ ਅੱਖੋਂ ਓਹਲੇ ਹੈ ,
ਸਿਰ ਦੇ ਉੱਤੇ ਗਠੜੀ ਭਾਰੀ ਯਾਦਾਂ ਦੀ ।
ਤਨ ਤੋਂ ਲੈ ਕੇ ਰੂਹ ਤਕ ਜਖ਼ਮੀ ਹੋਈ ਏ,
ਪੁੱਛੋਂ ਨਾ ਕਿੰਝ ਪੀੜ ਸਹਾਰੀ ਯਾਦਾਂ ਦੀ ।
ਜਦ ਵੀ ਕਿਧਰੇ ਕੱਲਮ ਕੱਲੀ ਬਹਿੰਦੀ ਹਾਂ,
ਸੀਨੇ ਖੁੱਭੇ ਤੇਜ਼ ਕਟਾਰੀ ਯਾਦਾਂ ਦੀ ।
ਸੁਪਨੇ ਦੇ ਵਿੱਚ ਮਹਿਲ ਬਣਾਏ ਰੀਝਾਂ ਦੇ,
ਕਰਕੇ ਰੱਖੀ ਚਾਰਦਿਵਾਰੀ ਯਾਦਾਂ ਦੀ ।
ਮਿੱਠਾ ਮਿੱਠਾ ਦਰਦ ਜਿਗਰ ਵਿਚ ਉੱਠ ਰਿਹੈ,
ਨੈਣਾਂ ਵਿੱਚ ਹਰ ਵਕ਼ਤ ਖੁਮਾਰੀ ਯਾਦਾਂ ਦੀ ।
ਢੋਹ ਲੈਂਦੀ ਹਾਂ ਬੂਹੇ ਜਦ ਮੈਂ ਸ਼ਾਮ ਢਲੇ਼,
ਖੁੱਲ ਜਾਂਦੀ ਫਿਰ ਕੋਈ ਬਾਰੀ ਯਾਦਾਂ ਦੀ।
ਦੂਰ ਕਿਤੇ ਉਹ ਜਾ ਕੇ ਮੇਰੇ ਕੋਲ ਰਹੇ ,
'ਬੱਬੂ' ਇਹ ਹੈ ਕਾਰਗੁਜਾਰੀ ਯਾਦਾਂ ਦੀ।
ਬੱਬੂ ਸੈਣੀ 🌀
Comments
Post a Comment